Lebanese Tweep: @FunkyOzzi

Click on image to view FunkyOzzi's profile

Click on image to view FunkyOzzi’s profile

الموضوع رجع انطفى بلبنان، ما بعرف شو عاد صار بالنسبة لمنع التدخين بالأماكن المغلقة، مش هون موضوعي انا، المهم هلق، المشكلة عندي اكبر من هيك. يا خيي انا يللي ما بفهمه بهالحياة انو ليش لمّا بدنا نمنع شي مضرّ أو غلط أو بيسبب مشاكل منصير منغنّج الناس؟ مش عم قول نقمع الناس ونحبسن اذا خالفوا، في وسيلة ثالثة أو حل وسط ممتاز برأيي.

هالموضوع طويل بس بحب احكي فيه لأنو بشوفه كل يوم وصراحة يللي لفتلي نظري للحل مهندس اسمه جاك فريسكو عمره اكتر من ٩٥ سنة صاحب مشروع ڤينوس. لا شك انو انسان فظيع وفكرة مشروعه خيالية وممتازة. ما رح احكي عن مشروعه هون بس رح احكي كيف غيرلي طريقة تفكيري ومعالجتي للمشاكل.

التدخين، مضرّ؟ بدّك تمنعه؟ امنعه! ليش عم تغنّج العالم وتكتب عالعلبة انو وزارة الصحة تحذر من التدخين ويؤدي إلى أمراض خطيرة ومميتة؟ أساسًا مين وقّف تدخين من بعد هالتحذير؟ كم واحد؟ ٤٠٪؟ وال٦٠٪ يللي بيدخنوا عم تشتغلوا عليهن؟ كيف عم تشتغلوا عليهن؟ حملات توعوية ضد التدخين؟ مهضوم انت والناشط الاجتماعي يللي عم يشتغل عهالحملات، لأ وعم يدفعوا مصاري لينفذوا هالحملات، لنمنع شي او نحد من استعمال شي خلينا نعمل استثمار بحملة توعوية نتيجتها طق حنك. او شو رأيك بهول العيادات لوقف التدخين بجلسة واحدة؟ أو خلينا نمنعه بالأماكن المغلقة هيك بيتعلموا الزباين. وبدبي بيعملوا شي اسمه اليوم العالمي او شي هيك من دون تدخين، السوبرماركت ما ببيعك دخان بهالنهار. واو شو فظيع عم قلك خفت نسبة المدخنين ٨٠٪ من ورا هالحملة الفاشلة. مش عم قول روح عالاكستريم التاني وحبّس كل شخص بيدخّن او بيدفع غرامة اذا دخّن. اذا مش قادر تمنع الدخان ما تفشّ خلقك بالمواطن الرخيص. ما هو اساسًا عم يدخّن قد ما قرفان من الوضع يللي جريتوه عليه. اتس ذي ڤيشس سايكل. الحل متل ما فنكي أوزي كتبت فوق، ما فيك تمنعه، احتال عالزبون، ركعه، عجّزه، عذّبه، مش تغنجه، ولا تسحب منه مصاري او تقتله مستقبله وطموحه وتحبسه. يا بتمنعه من لغاليغه للدخان يا بتصعّب الموضوع عالمدخن. يا خيي امنع القداحات كبداية. خلي المدخن يشعل سيجارته بعيون الغاز بركي بيحرق حواجبه؟

من موضوع الدخان لموضوع السواقة، يا خيي السرعة بتأدي لحوادث سير؟ ليش بتحط رادار؟ ليش بتحط حد للسرعة؟ ليش عم تدفّع السائق المخالف غرامة؟ ليش عم تسحب منه الدفتر؟ ليش عم تفش خلقك بالمواطن المعتّر الجاهل؟ ما في حل أحسن؟ شو رأيك تعمل سيارة ما بتسرع فوق ال١٠٠؟ شو رأيك تعمل سيارة بتجبرك تخفف اذا تخطيت ال١٠٠؟ شو رأيك تعمل طريق ما بتعرّضك للحوادث؟ جاك فريسكو عنده هندسة طريق خالية من الحوادث روح شوفا.

منجي عالشعوب المختلفة والعادات والتقاليد الغريبة عجيبة. هون بدبي، المترو، عاملينه بطريقة جدًا ذكية ومعايير السلامة كتير عالية الجودة لأنو بيعرفوا انو شعبنا ما معوّد عالنظام. ما راحوا قالوا للناس اوعى تنط هون وتنتحر. راحوا عملوا عازل عن السكة من قزاز كرمال ما حدا يجن وينط. بلندن فيك تنط عالسكة وتنتحر. ومع كل هيدا في ناس بتجن وبتنط وبتنتحر بلندن. بس مترو دبي عملوا غلطة كتير هبلة. راحوا كتبوا عالارض انو بس يفتح باب المترو يللي جوا المترو وطالع منه بيضهر من النص ويللي فايت عالمترو بيفوت من الجناب عالميلتين. يا حبيب القلب مين فاضيلك يقرا؟ اصلًا مين رح يلتزم؟ مش هيك بتصير القصة. بتعمل باب بس يفتح بيطل صباط بيلبط بكل شخص بيحاول يفوت هني والركّاب ضاهرين من المترو. مش بترسملن خريطة عالأرض ليدعسوا عليها! اوك؟ بتمنى انك فهمت الفكرة. يعني اذا بدي اعتمد عفلان يلتزم بالقانون بقضي عمري كله عليه عم فهمه وما رح يفهم. بس لبطة بتجيب أجله (لبطة روبوتيكية اوتوماتيكية غير بشرية من صميم تصميم الباب للمترو) رح تخليه يلتزم ومتل الشاطر. خلصنا بقى قوانين وارشادات وغرامات ومخالفات، النظام يللي قادر المواطن يخترقه ويحتال عليه، هو نتيجة غباء مهندس النظام، والحل مش بقمعه او توعيته للمواطن الرخيص بس المحتال، الحل بتصميم هندسي ذكي ما بخليك تحتال عالنظام.

ايه خلينا نصعب القصة عليه للمدخن، نقرصه شوي، نعذبه، نخليه يسرق ليشتريا لهالعلبة، ونفوته عالحبس ونرجع نبيعه نفس العلبة جوا الحبس، ليمرض ويفطس ويموت، لحظة شوي، ما المواطن ما معه ياكل، والسيجارة مش هلقد ضرورية، لا لا خلينا نزيد سعر تنكة البنزين، خلي يحرق بنزين ويحرق سيجارة سوا، خلينا نجوعه لهالمواطن المعتر، خليه يشتري دخان ومحروقات بسعر مناسب ويتسلّى ويحرق دواليب بالشوارع ويهستر ويحرق أعصابه. ما بيكفي عم ندفعه فاتورتين كهربا؟

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s