Lebanese Tweep @DanOverHere

Click on image to see Dan's profile

Click on image to see Dan’s profile

دبّرني خيّي بدّنا ناكل. جيب أيّ شي. على سيرة المطاعم والتعامل مع الزبونات مؤخرًا في موضوع عبالي احكي فيه لفشّ خلقي شوي. بس تفوت عمطعم هالايام بتلاقي الوايترية كتير مهتمين فيك، وج بشوش وبيرحبوا فيك واهلا وسهلا وبيقعدوك عالطاولة وكله عذوقك استاذ ومن هالخبريات. انت شو بتفكّر والله شي مهم صاروا بيهتموا اكتر من قبل. بتتفاجأ بعد كم دقيقة كيف بيصير التعاطي معك ومع الطاولة تحديدًا. مدير المطعم متفق مع الوايترية انو لكل طاولة وايتر مسؤول عنها. هيدي الطاولة بإسمك يا فلان. بيجي الطلب وكله ماشي الحال وبتحب تطلب شي زيادة ما بقى يبيّن عليك الوايتر المسؤول عن طاولتك. بتلمح وايتر تاني فبتعيطله، اذا رد عليك بيأشرلك بإيده انو يلا لحظة، بيصيريلتفت يمين وشمال عم ينبّش عالوايتر المسؤول عن طاولتك بس مش مبيّن عليه. لحظة لحظة لحظة. انت ما فيك تجي؟ لأ! ليه؟ انا مش مسؤول عن طاولتك! ايه واذا يعني؟ بركي تشردقت وبدّي كباية مي عم بختنق؟ بتخليني افطس وموت؟ او بتجي بتخلصني الله يخلصني منك؟ شو هالمنطق الأعوج؟ اساسًا وين بيختفي الوايتر اذا مسؤول عن طاولتي؟ بتكتشف بعدين انو هالوايتر المعتر مسؤول عن سبع طاولات غيرك وكلن عم يلتفتوا يمين شمال متلك بدن هالوايتر المعتر. ولمّا يشرّف الوايتر، بيضيع، بينعجق، ما بيعرف اي طاولة مهسترة ومعصبة اكتر من التانية ليخدمها بالأول. يا خيي شو هالخدمة هاي؟ مين علمكن تعملوا هيك؟ بعد كم دقيقة بيختفي الوايتر بالمرة بتصير بتسأل عنه بيخبروك انو خلص الشيفت تبعه واستلم واحد تاني عنه. وخود بقى على فوضى. وطبعًا ما بدنا ننسى لمّا تطلب الفاتورة بالآخر. لحظة تذكّرت لمّا بيجي مدير المطعم على طاولتك انت وعم تاكل ويسألك اذا كل شي عذوقك، بيذكّرك بحكيم الاسنان يللي فاتحله تمك وعم يسألك شو اخبارك، خيي حل عني هلق ما شايفني ملبّك بيللي بتمّي؟ ولمّا تطلب الفاتورة بيبلّش مسلسل جديد، مدير المطعم بيصير يفتل يمين شمال تيشوف كيف الحركة بالمطعم، اذا في كتير عجقة وناس ناطرة تيحاسب الزبون تياخدوا محله، الفاتورة بتجي عالطاولة قبل ما تطلبها اساسًا. واذا ما في عجقة، ما بتجي الفاتورة حتى ما تفضى الطاولة لأنو الزبون بيحب يفوت عالمطعم العاجق مش يللي عم يكش دبان. مافيات خيي

هالموضوع جدًّا بيعنيلي بما انّو صرلي ثلاث سنين ما بسوق. ما بسوق لسبب وحيد ما في غيره، القوانين الفاشلة يللي حكيت عنها الاسبوع الماضي. جاك فريسكو اذا بتتذكروه. عم برجع اذكره وذكّركن تاخدوا فكرة عن مشروعه ڤينوس. المهم بالنسبة للتاكسيات مرّة طلعت مع تاكسي ما خبّرني شي ابدًا بس انا وعم بكتب تويتس وواتساب على تلفوني صار بدّه يقرا شو عم بكتب، لمّا سألته اذا عباله يقرا فاجأني بجوابه. ما بيهمني شو عم تكتب وشو عم تقرا، بس بدّي افهم انتوا هالجيل ايمتى رح تتركوا هالتلفونات من ايديكن وتركزوا معي بالطرقات. صفنت فيه شي عشر ثواني وقلتله، بدّك سوق عنّك شكلك تعبان اليوم؟ قال لأ هيدي شغلتي ما قصدي تاخد عنّي بس بركي ضيّعت بالطرقات ما بدّك تعرف وين رايح؟ قلتله شغلتك وبدك تضيّع بالطرقات؟ قال ايه بركي عم بخطفك؟ قلتله اذا تركت تلفوني وركزت عالطريق معك وفجأة انتبهت عليك انك عم تخطفني فكرك رح قلك يعني لوين آخدني أو نزّلني هون؟ انو يعني رح ترد عليي اذا قلتلك وقاف هون ونزلني اذا انت بدك تخطفني؟ فكان جوابه طيب ليش عم تكتب لرفيقك عالواتساب انو اذا صار معك شي بالتاكسي تعا خلّصني وهيدا رقم سيارته؟ ساعتا قلتله نزلني هون

يللي ما بيسأل عنك ما تسأل عنه، انساه، اقبعه من حياتك، شو بدك فيه، ليه عم تفكّر فيه؟ ليه عم تسأل عنّه؟ بتحبّه؟ حبّه عالسكت! سآل عنّه من دون ما تلومه وتعاتبه وتربحه جميلة خيي. بعدين شو هالحب يللي من طرف واحد؟ على شو حابّه؟ اذا في شي معيّن او مصلحة معه صارحه خيي. يمكن هو ناطرك تسأله. ما تستحي. صعبة نمنع شخص ما يسأل عنّا. ما فينا نمنعه. وما فينا نتجاهله بنفس الوقت. وحتى لو عم يزعجنا. هيك تعلمت بشغلي مع زبونات بيزعجونا بحبّن للشركة. هيك ناس صعب جدًا تبخعهن وصعب جدًا تتجاهلهن والأصعب لمّا تسأل عنهن مرّة وحدة بالحياة بيبطّل يتركك. فولو دان خيي بس ما تطلبوا منه يسأل عنكن.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s