Lebanese Tweep: @AnisTabet23

Click on image to see Anis' profile

Click on image to see Anis’ profile

ما في تسعيرة موحدة لهالخدمة بلبنان، وحتى ب ولا بلد بالعالم، كل مطرح عنده تسعيرته. مش هون الفكرة، انو اذا ما في تسعيرة لهالخدمة بهالمطرح بالذات، معناتا متل ما عم يقول أنيس، بتصير العملية بخشيش (بقشيش) وانت حر تعطي يللي بدك ياه. في هول يللي بتسألن قديش بتريد بيجاوبك قد ما بدك استاذ. وبس تعطيه مبلغ معين، بيصير بيقلك الله يسامحك استاذ، طب ما قول قديش بدك بلا هالمحن. المهم، منرجع عالتسعيرة والطمع. ليش فنجان القهوة بأوتيل خمس نجوم حقه ٢٣ ألف ليرة؟ كل ما اسأل حدا هالسؤال بيقلي طبعًا كله بحقه، عم يعطوك خدمة خمس نجوم، وقاعد بمنطقة خمس نجوم، شو يعني بدك مين ما كان يفوت لهون وياخد فنجان قهوة ب١٠٠٠ ليرة؟ يا خيي شو تعريفك لشخص مين ما كان او حيالله؟ خلينا بفنجان القهوة هلق. فهمنا أوتيل خمس نجوم بيفرق كتير عن أوتيل ثلاث نجوم بس قهوة الخمس نجوم هي نفسها قهوة الثلاث نجوم والبلا نجوم بالمرة. يا خيي اذا مش عاجبك ما تشرب قهوة بأوتيل خمس نجوم. هيدا الجواب النهائي لكل نقاش. اذا مش عاجبك فل من هون. كل نقاش بينتهي هون. رح يجي نهار تفتح نقاش نحن ليش مناكل هوا بلبنان، اذا مش عاجبك فل من هون. بتفل من هون، بتاكل هوا من نوع تاني بغير بلد. لك آخ. المشكل مش بالهروب بس، بيقولوا الهروب تلتين المراجل، بس اوقات المسألة مش بالهروب، بالتطور، بالتغيير، بالاصلاح، لحظة لحظة، صرنا عم نحكي سياسة. بعتذر

بتصير طبعًا، كذا مرة سمعنا عالتلفزيون انو بدنا فيروز تغني بنيويورك وجيبولنا جوليا بطرس بمونتريال. بس بتصير على نطاق كتير صغير. مش عم قول انو فيروز او جوليا او جورج وسوف مش مشهورين بس شهرتهن اصغر بكتير من شهرة الموسيقيين والفنانين العالميين يمكن بفعل الميديا والكثافة السكانية. ذكرني هالموضوع لما مات پول ووكر كيف انتفضت الناس انو ليش عاطيين الموضوع اكتر ما بيستاهل خيي. شو ليش عاطيين الموضوع اكتر ما بيستاهل، انا عن نفسي مش حاضرله ولا فيلم وما سامع فيه بحياتي (أنيس اذا عم يقرا بيكون عم يشد بشعره هلق انو كيف ما سامع فيه ومش حاضرله ولا فيلم) بس يا خيي حتى لو ما بعرفه، في ميات الملايين اذا مش مليارات من الناس بيعرفوه وحاضرينله افلامه، ومشهور بالسينما واعلاميًا. ما بدكن الناس تحكي عنه؟ بيجي شخص بيقول والله ما شفت اللبنانيين حكيوا عن ابن عمي يللي مات بحادث سيارة عالاوتوستراد تبع ضبية مبارح! وبكل جدية بيقولا. حبيبي مع احترامي لابن عمك واهمية الموضوع، بس كم الف شخص بيعرفك وبيعرفه؟ مش عم قول انو الموضوع سخيف انتبه، بس التغطية الاعلامية وشهرة الشخص ما بتتقارن بشخص لاحقينه وبيعرفوه ملايين. القصة نسبية تسلملي معليه اذا انطوش راسك فيه لپول ووكر كلا يومين تلاتة وبيموت حدا غيره قصدي وبتنسى الناس هالموضوع. سايرنا شوي خيي

لك هاااااااااااي كيفك وشو اخبارك وطمنا عنك ووينك بهالايام ايه نيالك وكيف دبي وكيف العيشة بدبي ومبسوط؟ وانت مستغرب هالحب، وبتعرف كتير منيح لوين رايح بحديثه، فما بتسأله شي ابدًا، بيصير لحاله بيخبرك عن قصته، قصدي اسطوانته يللي ما في غيرا، الوضع بلبنان زبالة وما في شغل، عم نشتغل بس ماشي الحال يعني عم نبّش عشي احسن، وانت عم تسمع من دون ولا كلمة، بعد شوي، بتعرف عم نبّش على شغل، فيك تساعدني خيي؟ طبعًا فيي ساعدك، كيف؟ ماشي شو بتشتغل وشو بدك تشتغل؟ انا عامل بزنس خيي احلى شي وين ما قدمت بتجي راكب، اه براڤو فاذن اذا لقيت شي بيناسبك ببقى بخبرك. طيب ما بدك اعطيك السي ڤي؟ ببعتلك ياها بالايميل؟ شو ايميلك؟ هلق دقيقة وبتكون عندك. لا حبيب القلب انا اذا لقيتلك شي ببقى بطلب السي ڤي منك. طيب خدا ما بتخسر شي؟ انو خليها معك. لا خيي شو بدي فيا بس لاقيلك شي دغري اسرع بدقلك حتى تبعتلي ياها. طيب شو بتخسر اذا وزعتلي السي ڤي على اصحابك؟ صراحة ما بخسر شي، بس اصحابي اذا عم ينبشوا على حدا بيسألوني دغري، واذا سألوني بيوثقوا فيي، ما رح يطلبوا سي ڤي لشخص عم انصحهن فيه. موضوع طويل هيدا ببقى بشرحه على رواق غير مرة. المهم هلق، احسن ما قلك حل عني وابعتلي السي ڤي رح قلك شي احلى، فولو أنيس لأنو اكيد رح يساعدك ويوزعلك السي ڤي، عم بمزح مين اله جلادتك خيي؟

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s