Lebanese Tweep: @Egg_Culture (On family and relatives)

Click on image to view Riad's profile

Click on image to view Riad’s profile

ركّزلي على كلمة ويبسايت، مش فيسبوك، ولا تويتر أكيد. الموقع الالكتروني، مش حتى البلوج، ما بدنا العيلة تعرف اي شي عن حياتنا الشخصية، مش انو يا لطيف عم نحط كل اسرارنا الشخصية على فيسبوك وتويتر والبلوج (لحظة انت أكيد؟) روحوا عالويبسايت يللي ما بقلبه اشيا شخصية عنا. يمكن فهمت رياض غلط، يمكن قصده يقول انو بدل ما يجوا لعنا عالبيت ليش ما بيوفروا علينا هالزيارة وبيروحوا عالويبسات؟ أريحلن وأريحلنا. هلق القرايبين مش هلقد سئيلين، بس كل ما جيت من منطقة زغيرة بالحجم وبالكثافة السكانية والموقع الجغرافي البعيد عن العاصمة، كل ما زاد التدخل بشؤونك وبحياتك الخاصة من قبل القرايبين، وطبعًا هالشي من ورا الزيارات والصبحيات يللي عم تخف سنة ورا سنة

بهالإيام الصعبة عم تخف الزيارات العائلية، وصاروا القرايبين يدقولك تلفون يتطمنوا عليك من وقت للتاني، أمرار بحس التلفون ما بدق غير اذا كان المتصل شخص بيقربك او شخص مصلحجي. في تويت كتبتا بتقول انو المصلحجي بيتصل فيك اكتر من صديقك. المهم يا ريت في آپ بتخبرك انو قرايبك بده يتصل فيك، مش لتسكر تلفونك، فيك ما ترد أصلًا، لحظة ليش فيك ما ترد؟ والله بيخربولك بيتك بالانتقاد والحكي والثرثرة واللتلتة عليك اذا ما بترد عالقرايبين، شو هالولد الناكر لأصله. المهم لو في اشارة بس انو فلان بده يتصل فيك كنا أخدنا احتياطاتنا من الأسئلة والتحقيقات والعتب والملامة والتلطيش والحكي لنشوف كيف بدنا نجهز اجوبة ذكية وسريعة وحاسمة. خرجك بتستاهل

يعني قد ما حاولت تهرب من العيلة والقرايبين، بيضل في مناسبات بتجبرك تتقرب منهن، وتضل على تواصل معهن. عشو اسمن قرايبين؟ فجأة حدا من العيلة بيطرق زواجة واجتمعت العيلتين ولحّق بقى على اجتماعيات، وعندك فيسبوك؟ طبعًا ما حدا بيسألك اذا عندك تويتر لأنو يللي بيستعمل تويتر بيعرف قديش محرج هيك سؤال

بما انك علقت وانجبرت تزيد القرايبين على فيسبوك صرت بتلاقي حالك عم تتفاعل وتتواصل معهن رفع عتب، مش بس رفع عتب، متل ما قال رياض، يا خيي نتواصل معهن على فيسبوك ولا نفتّحلن عيونن عالمصايب والفضايح بتويتر، خليك هونيك ما تقرّب لهون أبدًا ابدًا

طبعًا كل شخص مدمن على تويتر متلي، بيعرف كتير منيح انو العيلة التانية هي انتوا، جماعة تويتر، تعوا ناخد صورة عائلية سوا، بشي تويت أپ قريبًا، يا ريت والله، فولو رياض بس انتبهوا منه ما رح يحبكن قد عيلته وقرايبينه

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s