مشروع ليلى في الأردن – شو كان رأي المغردين الاردنيين

عرض سريع لتغريدات من الأردن عن حفلة مشروع ليلى بعمّان:

Advertisements

بمناسبة عيد الجيش اللبناني والمؤسسات الكوكبية

صرلي فترة طويلة عم صارع افكار براسي، عن الجغرافيا بشكل عام والمؤسسات بشكل خاص، وبمناسبة عيد الجيش اليوم، طبعًا تحية اجلال واحترام لهالمؤسسة وللشهداء والابطال يللي دفعوا دم لحمايتنا ويللي عم يدافعوا عننا.

ذكرت هالمؤسسة بما انه تعتبر مؤسسة بالمبدأ لا تتأثر بجهة سياسية/طائفية/حزبية معيّنة وتعمل بإخلاص للوطن وبنزاهة وبمسؤولية تجاه المواطن، وما عندي اي شك بهالموضوع.

الموضوع الأساسي هو المؤسسات، والتركيز بالتدوينة عالمؤسسات، وبحب تكون واضحة هالجملة انه ما بدي احكي عن الجيش، بدي احكي عن المؤسسات.

صرلي كمان فترة عم حاور صديق تربّى على مبادىء وفكر الحزب السوري القومي الاجتماعي، وبما انّي مش كتير متطّلع على فكر هالحزب، بنظر اليه كمؤسسة. الحوار دايمًا شيّق، بس حسّيت بمطرح من المطارح انه سوريا الكبرى او الهلال الخصيب او بلاد الشام كبقعة جغرافية بتشبه فكرة ال١٠٤٥٢ كلم مربع يللي هي بقعة لبنان، بس على أكبر.

لمّا سألته عن توسيع الرقعة الى سائر المشرق او المغرب او اي بقعة ثانية، ومش تركيزها فقط على سوريا الكبرى، تشعّب كتير الحديث وفتنا بعادات وتقاليد واشكال وتربية الشعوب المختلفة وما قدرت افهم عليه كتير ليش الحدود هون ومش اوسع، يعني اذا انا شايف لبنان بقعة، كمان سوريا الكبرى بقعة، والشرق الاوسط بقعة، وقارة آسيا بقعة، والكوكب كله بقعة، ما فهمت ليش عم نحد حالنا ببقع صغيرة نسبيًا مقارنةً بمساحة الكوكب كلّه.

منرجع للمؤسسات، ليش لبنان مؤسسة؟ ليش هالبقعة الصغيرة مؤسسة؟ ليش سوريا الكبرى مؤسسة؟ ليش الهند مؤسسة؟ مش الكوكب بكامله مؤسسة؟ مش هيك جينا على هالارض؟ ليش اخترعنا اسامي وحدود وجوازات سفر وهويات للدول؟ ليش قسّمناها؟ ليش انا لبناني وانت سعودي؟ ليش انا بدّي ڤيزا على أميركا والأمركاني ما بدّه ڤيزا على لبنان؟ او عالعالم كلّه؟

طب ما كلنا بشر، واذا انا مجرم ليش فلتان بالشوارع؟ ليش السفارة لازم تقرّر اذا انا مجرم؟ طيب السفارة مؤسسة صح؟ ليش في ١٧ ألف سفارة؟ ليش السفارة مش مؤسسة واحدة؟ انا كوري حابب سافر على الكاريبي، ليش بدي روح على سفارة كاريبية حتى اطلب تأشيرة؟ ليش ما في مؤسسة السفارة الكوكبية؟ يمكن حتى ما في داعي لسفارة كوكبية، روح سافر خيي. انسان ما خصّك شو جنسيته وطايفته وانتماؤه حابب يسافر على موسكو، ليش لازم يسأل سفارة روسيا؟ اتركوه يسافر على موسكو، السفر على موسكو جريمة؟

متل المنتجعات يللي ما بتسمح للناس يفوتوا يسبحوا لأنه شكلن ما اعجب الحراس عالباب؟ يا خيي اذا عليه جرم سلمه للشرطة، اتركه يفوت يسبح، اذا حاول يعمل جرم امسكه، على شو اسمك حارس أمن؟ ولشو في كاميرات مراقبة؟ مش لحتى تراقب الناس يللي عم تحاول تغلط؟

لو شرطة المنتجعات او خفر السواحل وشرطة باي واتش تابعة لشرطة واحدة، مؤسسة واحدة حول العالم، اعتبر اسمها مؤسسة الشرطة الكوكبية، من شو خايف؟ ما بالعكس انت تابع لأقوى جهاز شرطة بالعالم، ليش فتحت على حسابك وانشأت مؤسسة ضعيفة اسمها شرطة الأداب اللبنانية؟ شو امكاناتها هالمؤسسة الصغيرة؟ شو معلوماتها؟ شو قوتها عالأرض؟ قديش واصلة؟ مين داعمها؟ مين عم بيموّلها؟ شو قادرة تعمل عالأرض خيي؟ مش مبينة عالخريطة خيي. سكّر هالدكّانة خيي، او افتح دكّانة تابعة لمؤسسة الشرطة العالمية فرع لبنان، هيك الك كلمة اقوى، ونفوذ، وسلطة، وامكانات، ودورات تدريبية، وعتاد، واجهزة.

بالحديث عن الدورات التدريبية، انت كيف بتفتح مؤسسة تدريبية على حسابك؟ مين عاطيك الرخصة خيي؟ شو امكاناتك التدريبية انت خيي؟ وين دارس؟ شو شاغل؟ مع مين شاغل؟ ليش مش منتمي لمؤسسة التدريب الكوكبي؟ مين يعني مؤسسة طالب كبارة للتدريب؟ شو تاريخك انت؟ شو انجازاتك انت؟ خيي شو بتعرف انت؟

وين دارس؟ من وين شهاداتك؟ شو يعني جامعة الألسن بالزقازيق بمصر؟ تابعة لمين هيدي خيي؟ ليش في ١٧٨ ألف جامعة حول العالم؟ شو هالدكاكين يللي فاتحة عحسابها؟ ليش مش كل الجامعات تابعة لمؤسسة الجامعة الكوكبية؟ فرع الزقازيق بمصر؟ 

ليش في نظام اشارات سير واحد حول العالم؟ ليش مش كل شارع بيفتح عحسابه نظام اشارة سير؟ ليش وحّدنا الالوان؟ يا خيي ليش ما في اشارة سير لونها ابيض؟ واذا ضوت ابيض يعني لازم تطفي السيجارة انت وعم تسوق؟ ليش بس احمر اصفر اخضر؟ ليش في ستاندارد عالمي باشارات السير وما في ستاندارد عالمي بقوانين السير؟ ليش لبنان عنده قانون سير خاص فيه؟ تابع لمين خيي؟ في قانون دولي، ليش مش تابع لمؤسسة السير الكوكبية؟ ليش في ٢٠٠ نوع رخصة سواقة بالعالم؟ ليش مش رخصة سواقة كوكبية؟ ليش ممنوع البنت تسوق سيارة بالسعودية وبكل دول العالم مسموح؟ ليش فاتحين عحسابهن؟ 

منرجع عالجيش، ليش في جيش لبناني وسنغافوري واسكتلندي؟ ليش مش جيش واحد حول العالم؟ مؤسسة الجيش الكوكبي؟ ليش بدنا جيش اذا كلنا تابعين لمؤسسة الجيش الكوكبي؟ ليش بدنا سلاح؟ عن مين بدنا ندافع؟ عن الكوكب؟ بدنا نثور على مين؟ ع كوكب كيپلر الشبيه بالأرض؟ حرب الكواكب؟ قولك يعني جوليا بطرس غنّت يا ثوار الارض لانها عارفة رح نثور عالكواكب؟

عشتم وعاش كوكب الأرض.

٣ أسباب بتخلّيك تبقى بلبنان

لمحت نقاش صغير على تويتر عن موضوع مهم كتير بالنسبة لي، ويمكن مهم لكتير من اللبنانيين، المغتربين والمواطنين يللي عم يفكّروا بالهجرة او الاغتراب.

الموضوع كان من شخص سأل: اعطيني ٣ أسباب بتخليك تبقى بلبنان.

الموضوع اجا بوقته، بما اني رجعت على لبنان من شهرين ونص من بعد غياب دام ٥ سنين عن آخر مرة عشت بلبنان.

وبتدوينة سابقة حكيت عن رجعتي وكيف قدرت اتقبّل عيش بالفوضى بلبنان فيك تقراها هون.

قبل ما احكي بال٣ أسباب واشرحهم، في شخص قال شو في شي بلبنان ما ممكن تلاقيه برا لبنان.

التركيز رح يكون على أمور بتلاقيها بلبنان مش موجودة ببلاد برا وما ممكن تستفيد منها ببلاد برا بطريقة أفضل من لبنان.

٣ أسباب بتخلّيك تبقى بلبنان:

  1.  دايمًا في اكتر من حل لأي مشكلة
  2. وكتار بيتمنوا يفيدوك ليستفيدوا،
  3. وفي كتير فوضى بتقدر تستغلها.

رح فصّل كل سبب لحاله…

المشاكل وتعدّد الحلول

طبعًا وين ما تروح بالعالم في مشاكل، وما تفكّر انه في دولة بالعالم مش عم تعاني من مشاكل، فمن هون لازم تشوف العالم عبارة عن كتلة مشاكل، هروبك من لبنان بيريحك من عدة مشاكل بس ما بيلغي وجود المشاكل من حياتك، ورح تواجه مشاكل بالبلد يللي رايح عليه بس يمكن ما بتشبه مشاكل لبنان.

الموضوع مش هون، كل الناس بتعرف انه في مشاكل بكل بقاع الارض، الشي يللي ما كتير بيعرفوه اللبنانيين، انه في كتير حلول لكل مشكلة بلبنان، بعكس غير بلاد، وما اكتشفت هالشي غير لمّا عشت بالامارات بدبي تحديدًا.

قبل كل شي وقت قول حل مش معناتا الانتهاء من وجود المشكلة والغائها نهائيًا، المقصود بالحل انه دايمًا في طريقة حتى تهرب من المشكلة او تلاقي بديل او طريقة تحتال وتتذاكى عالمشكلة. 

أول شي بدنا نفهم انه بلبنان المشاكل ما بتنحل، المشاكل بتخلق بلبنان من ورا فساد او فوضى معينة، رح احكي عنها بالقسم الثالث، انت ما شغلتك كلبناني تحل مشاكل بلبنان، ولا تحاول تحكي بالقانون لأن القانون اذا كان موجود ما بيتطبّق وما حدا فاضيلك هلق، في اشيا اهم وفي اولويات ووجع راس اكبر من مشاكلك. ما بدك تشوف المشكل انه لازم ينحل، بدّك تشوف المشكل وتروح عالبدائل والوسائل اللي بتخلّيك تحتال او تتذاكى عالمشكل. رح اعطيك امثلة.

الكهربا، ما في لبناني عاقل بيستوعب انه كيف صرنا بال٢٠١٥ وبعدا الكهربا بتنقطع؟ وهيدي مشكلة عمرا يمكن ٤٠ سنة، والحل ما نضحك على بعض، لو بدا تشتي كانت غيمت، اذا بدّك تجي تطالب بحل، انسى، غيرك كتير جرّب، وغيرك كتير وعد، وغيرك كتير صلّح، بس كلّن فشلوا يجيبوا هالكهربا، بغض النظر عن الاسباب ومين بيتحمّل مسؤولية ومين لازم نحاسب، هول كلّن ما بيطعموك خبز، ما بدّك تفكّر هيك، بدّك تفكّر انه كهربا ما في شو البديل وشو الطريقة لنتذاكى عالمشكل؟

منجي بقى عالحلول: قبل المولدات، كان في شموع، بعدين اجت لمبة اللوكس، وبعدين اجا اختراع البطارية بالبيت، ومن بعدا صارت الناس تشتري مولد صغير للبيت، حتى اجا اختراع الاشتراك، وصار فيك تجيب الكهربا ٢٤ ساعة، بس ما فيك تدوّر اصنصير او دفّايتين وغسالة وسيشوار عالاشتراك، لأن بتك معك الديجونكتير، واذا تك يعني بدّك تزيد الامبير. وطبعًا فيك بالصيف تروح عالبحر وتستأجر شاليه بتجي الكهربا ٢٤ ساعة، او فيك تطلع عالجبل، هويات نظيفة وبرود وسقعة ما بتحتاج تدوّر مكيّف، وبعد في شي ٤-٥ بدائل غيرا مهضومة وبتكلفك شوي بس مفيدة ورح احكي عنها بالقسم التاني.

هلق طبعًا بدّك تجي وتقول شو بدي بهالحلول عم بدفع فاتورتين واذا بقدر سافر عبلد ما بتقطع اساسًا الكهربا فيه؟ روح تسلملي سافر، اغترب، هاجر، بس خبّرني عن مشاكلك ببلاد الاغتراب والمهجر، وخبّرني شو عملت حتى تحلها؟ مشاكلك ببلاد الاغتراب ما الها حلول ولا بدائل متاحة وبكترة متل عنا بلبنان، رح اعطيك مثال صغير عن الايجارات بدبي.

بدبي ايجارات السكن بتجي حسب المنطقة، يعني اذا بدك تسكن بمنطقة أ بتدفع هلقد، واذا بدك تسكن بمنطقة ب بتدفع ١٠-٢٠٪ أقل أو أكتر. أو في حل انك تعيش بمنطقة جدًا جدًا شعبية وبعيدة عن كل حياتك واجتماعياتك وشغلك وكزدراتك ومشوايرك ومقاهيك وملاهيك الليلية بتدفع ايجار أقل بشي ٥٠٪ بس طبعًا بتحطهن مواصلات وسم بدن عالطرقات وقياس الطريق من وإلى هيدا غير الجيران المحترمين يللي ما بيشبهوا عاداتك وتقاليدك بشي ابدًا، يعني مثلًا في شعوب بتاكل بسينات وما بتتحمم كل يوم وريحة الشقة بمناخيرك كل يوم، وفي شعوب بتربّي ٩ بسينات و٣ كلاب و٥ انواع عصافير بالشقة يللي حدّك، وحلها اذا فيك تحلها. بتدفع ٥٠٪ اقل او بتعيش متلك متل هاللبنانيين بمنطقة محترمة بتليق بمجتمعك وتربيتك الغير شكل عن الشعوب الباقية؟ ما عندك بدائل، البلد بيمشي متل الساعة هونيك اذا بتحاول تغيّر العقارب بيقلب نهارك ليلك وليلك نهارك وبتخبص معك، مش سايبة وفوضى هونيك، كل شي عالسنغي طق هونيك، السيستم بيروكب وبيخرب اذا بتحاول تحتال او تتذاكى عليه.

بلبنان فيك تسكن ب٤٥٠ دولار بنص شارع الحمرا، وفيك تسكن ب٢٠٠٠ دولار كمان بنص شارع الحمرا، هيدي مستحيلة بدبي، ما في خرق للسيستم بدبي، كله مسجّل عالورقة والقلم، في ستاندرد بدبي، بيمشوا هيك معك، ما في لعب يمين شمال، واذا شافوك عم تلعب يمين شمال متل ما جيت لعندن بترجع لوين؟ عبلدك الام والحنون لبنان! ليش في بلد تاني بيلمّك غير لبنان؟ ليش في احلى من لبنان؟

اذا ما فيك تسكن بالحمرا فيك تجي من نص طرابلس عبيروت ب٢٠٠٠ ليرة، في مليون وسيلة نقل بلبنان وبكل الاسعار المتاحة، وفيك تركب ڤان ١٤ راكب وفيك تركب ليموزين تاكسي، وما بتفرق معك من الارض للسما متل ببلاد برا. بدبي اذا بتطلع بڤان ١٤ راكب بتنزل منه بلا جزدانك، وتيابك عالمصبغة، وبتتحمم من غير شامبو، وبتتعطّر براويح الركّاب يللي معك. وبتوصل عالموعد مأخر ساعة.

حكّلّي تحكّلّك

السبب التاني يللي بيخليك تبقى بلبنان هو انه في كتير ناس بدها تفيدك حتى هي تستفيد منك. واذا ما بدك تتعاطى مع الغريب، فيك تبلّش من القرايبين والاصحاب، اذا ضربت ايدك عالتلفون بتتفشكل ب١٣ قريب و٦٧ صديق، وبعد ما رحت ولا مطرح وما عملت شي مع الغريب وما تعرّفت على حدا بمناسبة. 

ببلاد برا، بتشوف كتير الغريب، كل يوم، وبكل مناسبة، وبتاخد ارقامهم، وكروتتهم، وبتعملّن كونيكت على لينكدإن، بس ما بحياتك بتستفيد منهم، هول للبريستيج، هول عند اول مشكل، بيروكب تلفونن، بيجيهم اجتماع فجأة، بيسافروا، بيتركوا البلد، بينشغلوا، ما بتعود بتشوف وشّن. هول الغريبين ما خلقوا ليفيدوك وتفيدهم.

وحتى القريب والصديق ببلاد الاغتراب، مش فاضي، بحاله بذاته، مشغول بعيلته، او بتأمين لقمة العيش، بيشوفك بالمناسبات، بيتلفنلك بالمناسبات، بيساعدك بالمشكل الطارىء، بس مش قادر يفيدك كتير ويستفيد منك، مش بس لانه مشغول، لانه البلد ما بيسمحله يشتغل براني، او يحاول يتذاكى على السيستم ليعمل شي ضربة معلم، او صفقة هيك هيك، حتى لو كانت صغيرة، ورح اعطيك أمثلة.

أول ما جيت على دبي تلفنت لاصحابي وقرايبيني، ما في احلى منهم، كزدرنا وشمينا الهوا وعزيمة من هون وعزيمة من هونيك، هيدي هي، مش لحتى يفيدوك بشي اكتر او يستفيدوا منك، يعني متلًا بدّي استأجر بيت، بيعطوك رقم سمسار كتير آدمي وشاطر ولزيز، بس ما بيعملّك سعر، الايجارات بتحي ستاندرد، ما في شي اسمه انا بزبطلك ياها، وما في شي اسمه هيدا صاحبنا او قرايبنا بيزبطلي ياها، في لائحة اسعار بيمشوا عليها، وكل الدواير الرسمية روبوتية، بتمشي على التسجيل الصوتي، ما في مجال للمقايضة او الاخد والعطا كلّه واضح ارجع للمراجع والارشادات والقوانين والنظام، ما في حكّلّي تحكّلّك.

بلبنان، قبل الصديق والقريب، لجأت لتويتر، زتيت كلمة اني عم فتّش على بيت بالحمرا استأجره، والله خجلت قد ما طحشت الناس لتساعدني، وخود رقم فلان وسآل عن فلان وقلّه انك جايي من طرف فلان وبيزبطك وبيعملّك سعر وبيهتم فيك واذا قلتله انك ضايق خلقك ع شوي بيحيب نفس ارغيلة وبيسمعلك، عم بحكي عن السمسار يللي ما بحياتك شايفه، عم بحكي عن الغريب يللي ما بعمرك ساعدته، بس خلص لأنك جايي من طرف فلان، بيعمل المستخيل حتى يحكّلّك، لأن بيعرف وقت يعوز شي رح تحكّلّه.

عم بحكي عن الغريب، ايه كيف لو القريب والصديق الصدوق؟ العمى مقارنةً لبلاد الاغتراب، بيخربوا الدني كرمال يساعدوك وينفعوك بشي لان بيعرفوا رح ينتفعوا منك. يا خيي العلاقات بهالبلد حقها مصاري، ببلاد برا العلاقات بريستيج وعالفاضي، سآل مجرّب.

الامثلة كتيرة بس وصلت الفكرة.

الاستفادة من واستغلال الفوضى 

طبعًا لولا الفوضى بلبنان ما حدا بيقدر يعيش مبسوط فيه. جملة كتير غريبة ومعكوسة بتحس. في ناس رح تقلّك حبيبي من ورا كل هالفوضى ما بقي حدا بلبنان وهاجر. ايه صحيح. في ناس بتستحمل وناس لأ. في ناس بتستفيد من الفوضى وناس بتهستر منها. وفي ناس شايفة التطور ببلاد برا والفوضى والتخلّف بلبنان. وانا كنت واحد من هالناس. وانا مقتنع انه بلبنان في تخلّف وجهل وفوضى. بس بيوم من الايام سألت حالي: كيف في ناس عايشة بهيك فوضى؟ الاجابة كانت انه مستفيدين منها، واكتر من هيك، مستغلين وجود هالفوضى حتى ليستفيدوا منها. اخدتني ٣٤ سنة حتى استوعبتها، اخدتني عيشة بدولتين خليجيتين وبرمة حول الخليج وسفرتين تلاتة على اوروبا حتى فهمتها، اخدتني عشرات الالوف من التغريدات يللي قريتها، اخدتني ميات النقاشات على تويتر حتى وضحت الصورة، اخدتني الاف الساعات من التأمل حتى ركبت الصورة. في ناس عايشة من الفوضى، انتبه مش عايشة بالفوضى، ومش بالضرورة فوضويين، في فرق كتير دقيق بين هالتلات معادلات. 

الزلمي يللي استفاد من الفوضى وراح اشترى مولد كهربا ليضوّي شارع بكامله، هيدا مش فوضوي، هيدا مش عايش بالفوضى، هيدا عايش من الفوضى، عم يعتاش منها، عم يغتني حتى منها، الى ان تنتهي هذه الفوضى، وعندما تنتهي هذه الفوضى، لكل حادثٍ حديث. 

هلق طبعًا مش هينة تشتري مولد، ولو كانت هينة ومعك حقه، مش هينة تركب مولد بالشارع، وتاخد رخصة، لك شو هالرخصة،  وفيا كتير حكّلّي تحكّلّك، منرجع للقسم الثاني، انت بلبنان، في كتير فرص للحك، ومنرجع للقسم الاول، في كتير فرص لايجاد بدائل، اذا ما فيك تركب مولد، فيك تصلحه، فيك تبيع مازوت، فيك تمد اشتراكات، فيك تزيد عدد المشتركين فيك تحصّل مصاري من المشتركين فيك تعمل كتير اشيا.

شو رأيك بيللي فتح دكانة بمخيّم للاجئين؟ في اكبر من مصيبة اللاجئين؟ طب شو رأيك بيللي عم يأجّر بيوت للنازحين؟ ويللي عم يصف سيارات للنازحين؟ ويللي عطا اشتراك انترنت للنازحين؟ ويللي عايش من فوضى النازحين واللاجئين؟ 

انت بتعرف شو يعني تعمل بزنس مع نازح؟ انت بتعرف شو يعني تبني علاقات مع نازح؟ انت بتعرف لمّا تهدا فوضى النازحين شو هي الابواب والجسور والعلاقات والبزنس يللي رح يجيك من وراها؟ هيدي ما في منها ببلاد الاغتراب، هالفوضى ما في منها ببلاد الاغتراب، كل شي ماشي على السنغي طق من ناحية النزوح واللجوء، مش انت يللي بتستفيد من الفوضى ببلاد الاغتراب، في مؤسسات ودولة تهتم وتستفيد من هالاشيا، انت كفرد ببلاد الاغتراب ما شغلتم تفتّش على بدائل ووسائل وطرق للاحتيال والتذاكي عالفوضى، واذا دريوا فيك بتصير لاجىء يا بابا، والامثلة كتيرة.

 

كيف فسّرت الشعوب العربية هذا الفيديو

سأبدأ عرض التعليقات من زاوية الدول:

لبنان:

هذا الفيديو لحزب الله في الفلم الوثائقي ماذا لو هزم حزب الله
وتفسيره هو الصخره امريكا واسرائيل وكل قوى الشر والرجل الالي هو ايران وكيف تحامي عن ارض المسلمين هذه هي الحقيقه في انتاج هذا الفيديو
بدون تعصب عليك ان ترى بعينيك الاثنين لا ترى الامور بعين واحده
.
~مرتضى

الصخرة : الارهاب
الرجل الصخري : حزب الله
المدينة : وطني لبنان فيه بعض الخونة

لكن حزب الله لن يفعل مثل ما فعل الرجل الصخري و يترك بلدنا يتدمر

~لؤي

الرجل هو حزب الله …والخونه في القلعة . ونقطة عالسطر استحو يا عرب
.
~ماجد
القصر = عرسال/المستقبل
الصخرة= داعش
رجل من الحجر=حزب الله

عم بيجرب يساعدهم من الصخرة المتدحرجة باتجاه القصر ولكنهم يقومون بمحاربته .
فوقف جانبا يتفرج عليهم وهم يهدمونا قصرهم بغباءهم
.
~داني
الصخرة هي داعش والنصرة وامثالهما، اما الرجل الصخري فهو حزب الله، واما القرية فهي كناية عن لبنان. حزب الله دافع بشراسة عن لبنان من خلال محاربته لداعش والنصرة لكن رغم ذلك بعض اللبنانيين بدؤوا برميه بالحجارة، هذا جزاء الاحسان
.
~علي
الصخرة هي المؤامرات الدولية على لبنان العملاق الصخري هو حزب الله و القرية هي لبنان
.
~صافي

سوريا:

هذا أردوغان لازم يعمل فينا هيك بعد ما عبر نسبة لا يستهان فيها من ثوارنا وشعبنا عن شماتتهم ورأيهم فيه بعد ظهور نتائج الانتخابات التركية
.
~عبدالله

فلسطين: 

غزة الأبية هي الرجل الحجري الذي يدافع عن الأمة لكن الأمة ترميها بكل انواع الأسلحة
.
~عبد الحق 
العراق:
الصخرة هي ايران، والذي كان يحاول ايقافها هو العراق وصدام، اما القرية هي دول الخليج التي سعت
  جاهدة على احتلال العراق وخلع صدام.
.
~أمجد 
هذا الواقع مثل مايحصل الان في العراق في محافظة الرمادي الحشد الشعبي والقوات الامنية يدافعون عن ارض وعرض اهل الرمادي من جرذان الدواعش واهل الرمادي يتهجمون عليهم بالقتل والكلام السيئ ويشوهون سمعتهم حسبنا الله ونعم الوكيل هذا المقطع واقع حال في بلدنا نحن العراقيين.
.
~محمد
هذا العملاق هو الحشد وهل القلعة هم اهل الشمال وانشاء الله الحشد يخلي الحجارى اطيح على روسهم
.
~سيد حامد
هذا المقطع يدل على ما يحصل الان
الحشد الشعبي نقذ السنه من افواه
الدواعش وانقتل اكثر من ٧٠٠٠شهيد

من الحشد وبعد هاذا الفضل يقولون
سرقتم الثلاجه والذي ادخلته الشيشاني
والافغاني على نسائكم وهاذا حالكم
احنه حاملين الصخره الان اذ تركناه تنتهون
.
~جعفر
العملاق هوة الحشد الشعبي والقلعة هية الناس المنخدعة بسياسين ورجال الدين الذين يشككون بالحشد الشعبي اما الحجرة فهية العدو الاول داعش لكن الحشد ليش كل عملاق الذي يترك حجارتة مهما تعرض الى الاساءة فهوة اقوة من تهزة رياح نتنة
.
~علي
موضوع غاية في الروعة ،الحشد الشعبي المقدس يحرر لهم ديارهم ومدنهم بقليل من الاخطاء وهم جالسون يتفرجون وتحصل هذه في كل المعارك وهدية التحرير للحشد هي كل انواع المسبات والانتقاص منه والاتهام بالسرقة .
.
~سعد
هذا المقطع يمثل الصخره تمثل داعش واعوانها والقلعه تمثل اهل الغربيه والشمال والمناطق المحتله من قبل داعش
والرجل الحجري يمثل اهل الجنوب والوسط المدافعين عن العراق والذين لا يقبلون بتقسيمه فهم لا يضرهم شي فالخيرات متوفره بالجنوب لو انعزلو لا تضر مصالحهم اي جهه
لكن يرفضون التقسيم

واقع حال
.
~نور
هذه شبيهة مايحصل في العراق عندما يدافع الحشد عن مناطق اهل السنه من الدواعش يقومون بطعنهم من الخلف
.
~سعد
الجزائر:
الرجل الصخري مثل الملك أو الرئيس الذي يحاول حماية مملكته او دولته بكل ماأوتي من قوة وعلم وحكمة …..لكنه يخطئ في بعض الأحيان كما حدث مع الرجل الصخري الذي هدم جزء من البناء لكنه كاد ان يحمي المملكة لولا استعجال حماتها ” هذا الرجل الصخري يذكرني بالرئيس الراحل هواري بومدين رحمة الله عليه 
.
~هدى
مصر:
لم يستطع المصريين تحمل مرسي لمدة وجيزة، وطالبوه بإصلاحات في مدة محدوة، وعندما ايدوا الانقلاب العسكري الذي هو بالأصل تاريخيا لا يرحم حتى مؤيديه، حصل ما حصل في مصر من دمار للبورصة والميزانية والإنسان.
.
~جمال
الرجل الصخري كحركة الاخوان تحاول حماية مصالح الناس لكن لا أحد يحس بتضحيات الحركة
.
~عبدالله
ده حال الجيش المصرى بس هو لسه ماسكه الصخرة وبيحاول يرجعها خطوات وخطوات رغم ان فى بعض من داخل المنظومة بيخطئ لكن الجيش قوى واثق من نفسه ومتحمل ﻻخر لحظه رغم اهانة ابناء شعبه ليه
.
~أم بودي
هذا بالضبط ما يفعله الجهلاء مع الإخوان فى مصر
.
~أحمد
الرجل الحجري الرئيس مرسي حاول حماية القلعة (مصر ) من السيسي ونظام مبارك (الصخرة الكبيرة ) لكن للاسف الشعب ظن ان العدو مرسي فرماه بالحجر والنار وازاحوه وابعدوه وسجنوه فكانت النهاية هلاكهم عن آخرهم
.
~محمد
اليمن:
الرجل الصخري هو حزب التجمع اليمني للإصلاح في اليمن
اما بنسبة للصخرة هي جماعة الحوثي والرئيس المخلوع
.
~أبو مكي
الصخرة تمثل الحوثي وحلفاؤه والمدينة تمثل الشعب اليمني . اما الرجل الصخري فهو التجمع اليمني للاصلاح ومن معه من شرفاء الجيش والقبائل…للاسف الشعب لم يرى من الاصلاح والشرفاء الا ظهره وربطوا تهدم الجامع بالاصلاح غافلين الحقيقه التي وراؤه …متناسين اجتهاده في الدفاع عن الشعب واصبحوا يعاقبونه
ويرمونه من الخلف ..وأصبحوا عونا للصخره عليه ..
.
~محمود
دافع التجمع اليمني الاصلاح عن الوطن وحاول ايقاف الزحف القادم من الجبال(الحوثي) فهاجمه الجميع فتنحى جانبا فاجتاحت الصخرة وسقط الوطن ..
.
~ابو عمرو
الصخرة هي ال سعود , والرجل الصخري هو الشعب اليمني , وابناء القلعة هم باقي الاعراب ..
اليمنيون يريدون انقاذ العربان من ال سلول , فتحالف العربان لضرب اليمنيون … وسيبقى اليمنيون صامدون ولن يتركوا الصخرة حتى يتم تفتيتها
.
~فكري
السعودية:
هذه المملكة حفظها الله وحرسها حمة اليمن من الشر الإيراني والمد الصفوي الرافضي وان حصل بعض الضرر الذي لا يذكر
لكن حمتنى وحمة شريعتنا فتنكر لها عفاش الحقير عديم المروؤة بإرسال بعض عيدان الثقاب (صواريخه) ليكافئها
لكن هيهات فبعقيدتها لن تنهارالمملكة بحول الله وقوته
.
~محمد
تفسيري ان الحجر هو الشعب اليمني وان القلعه علي عبدالله صالح والحوثي والرجل الحجري هيا السعوديه الحجر كانت بتسحق علي عبدالله صالح في عام ١١ ولكن السعوديه انقذته ومسكت الحجر ولكن في عام ٢٠١٥ قام علي عبدالله صالح برمي بسهام من كان ماسك الحجر لكي لا تسحقه ولان هيا من يدعم هذي الحجر لسحق قلعه علي صالح والحوثي
.
~باسم
الكويت:
القلعه الدول العربيه. والمناره الكويت. والرجل صدام. والصخره ايران. وانتم كملو ما حدث في العرب
~مروان

ــــــــــــــــــــــــــــــــــــــــــــــــــــــــــــــــــــــــــــ

كيف فسّر العرب الفيديو من زاوية

الدين:

الصخرة هي إسرائيل والهجمه الصهيونيه على الإسلام والرجل الصخري هي الإخوان المسلمين التي تريد الدفاع عن الإسلام الضائع فكريا والقلعه هي الدوله الإسلاميه التي فيها العرب وحكامهم عندما ظنوا العرب أن الإخوان المسلمين تريد لهم الهلاك ونعتوها بالإرهاب …!!!
.
~المقداد
هذا المقطع يدل على خيانة المناطق الغربية للاهل الشيعة الذين يدافعون عن اعراضهم واراضيهم
.
~باسل
الرجل الصخري هم اهل السنه والجماعة
والصخره هم الشيعه والغرب وغباء اهل المدينه ساعد الشيعه والغرب على الفوضه حتى دمرتهم وسحقتهم
وللاسف الشديد هذا هو واقعنا

ستسحقنا الفتنه من حيث لا ندري حتى ننتهي
.
~مجهول
الشيعه يدافعون عن العرب والمسلمين وفلسطين ضد الصهاينه والعرب يفتون بقتل الشيعه وقتالهم في كل مكان ما رئيكم صحيح ام لا؟
.
~جعفر
المقطع ليس علاقة بصدام ولا ايران ولا داعش ولا الهيئة .!
الرجل الصخري قام بهدم الكنيسة عندما لمسها بكعب رجله مما جعل سكان القرية يهجمون عليه ويرمونه فأطلقو عليه السهام والمنجنيق وغيره من الأسلحة، علماً انهم لم يكونوا يعلمون انه يدافع عنهم من ذلك الخطر المتجه نحوهم، ولم يكن قصده تدمير الكنيسة.
في اعتقادي انه يقول عندما قمتم بألغاء دور الكنيسة هذا ما يحصل لكم الآن. طبعاً الفيلم للغرب وليس للعرب.
.
~عوض
الدوله الإسلامية هي الرجل الصخري وصحوات الرده والخونه من العرب هم اهل القريه
لاكن بأذن الله باقيه وتتمدد
.
~يحيى
هذا يدل على فهمنا الخاطىء عن الذى يدافع عن الاسلام و نظنه عدو..لانه هدم مسجد فى دفاعه عن امته…..و هذا يدل على اننا أمه تاخذ بالظاهر وليس بالباطن
.
~ضياء
الصخره هي الشيطان … والشخص الذي يحاول ايقافها قوي الايمان والعقيده والشخص الصالح من الناس وهم قله قليله … والقريه هي القريه الظالم اهلها ولايميزون بين الحق والباطل ومااكثرهم في هذا الزمان … ومع سقوط الصخره في الماء هل سيعقلون هل سيتدبرون اعتقد لا بل هم غافلون.
.
~محمد
كلا يغني على ليلاه … وليلاي أنا هي …. نداء لكل مسيحي مصر (جرس الكنيسه ) أنا معكم لا تجعلوهم يخبروكم بأني ……………..
ولا تفرحوا بما يفعل بي فقد أكون الأول ولا تدرون ماذا يحدث لكم بعد الانتهاء مني .
فالخطر الذي نواجهه واحد ..
.
~وليد
المؤامرة والفتنة والارهاب:
مشروع دعاية أمريكي و الرجل الصخرة هو امريكا و الحجر الكبير هو الارهاب و القصر هو الوطن العربي المعنى هو تريد امريكا ان تبرر نفسها للعالم بأنها ليست هي من تدير الارهاب و تموله و المعنى ايضا بان العرب لا يريدون يد المساعدة من امريكا
فذا الإخراج بعد ما خسرت امريكا ثقة كل العالم
وانا اقول يجب ان يكون معنى هذا الفردية هو الحجر الكبير اسرائيل و الصهيونية و الانسان الحجري هو امريكا و القصر هو العرب
.
~رامسن
القلعه هي الوطن
والرجل الصخري الجيش
والناس الي ترمي ع الرجل الصخري

الطابور الخامس ومثيري الفتن
.
~سيف
المقاومة والنضال:
الصخرة هي داعش والنصرة وأمريكا وإسرائيل، أما الرجل الصخري هم كل المقاومات التي وقفت بوجه مشاريع هذه الدول أما القلعة هي عقول بعض ابناء أمتنا المقفلة التي تعتقد ان من يدافع عنها يريد الهيمنة عليها وإلغائها وكما رأينا الكنيسة التي هدمت هذا يعني ان الغرب قد لعب هلى وتر الطائفية ليولد الحقد عند البعض
.
~أحمد
قول تجيفارا من اسوأ ماتمربه تموت على يد من تدافع عنهم
.
~زخات
بدلا من ان نصوب سهامنا للعدو نصوبها للمدافعين عنا
.
~ابو جهاد
المجتمع:
القلعة ترسوا آمنة مطمئنة والناس فيها سعداء يظنون أن القلعة حصينة بما يكفي ، وعلى بعد منهم يقف الرجل الحجري يرى الموقف بشمولية ، ويدرك الخطر الداهم ، لكنه في النهاية لا يعيش في القلعة ولا يدرك الشيئ الكثير عن معتقدات الناس وأفكارهم وآمالهم وآلامهم ، فحاول وقف الخطر الداهم لكنه دون وعي منه هدم شيئا عزيزا عند أصحاب القلعة والذي يرمز له هنا بالكنيسة ، فحاول الناس الدفاع عن معتقداتهم وتقاليدهم العتيقة دون تبصر أو روية فأخذوا يوجهون أسلحتهم تجاه الرجل الذي يقف لحمايتهم ، وهذا الرجل بدوره ـ ولأنه لا يدري أنه هدم شيئا عزيزا لديهم لجهله بدواخلهم ـ ظن أنهم يهاجمونه بلا سبب وقدر الموقف تقديرا خاطئا ورمى الناس بالجهل والغباء ولم يدرك ما تمثله الكنيسة لأهل القلعة فترك الصخرة تدمرهم أيضا بلا تبصر ولا روية . الرجل الحجري : المفكرون والفلاسفة الذين يعيشون في برج عاجي ويحاولون الإصلاح من الخارج دون الاحتكاك الفعلي بالناس . الصخرة : هي المخاطر الكبرى التي تواجه الأمة وقد تدمرها والتي لا يدركها إلا المفكرون والفلاسفة الكنيسة : أفكار الناس ومعتقداتهم وآلامهم المعيشية اليومية وأعرافهم وتقاليدهم . القلعة : عموم الناس . الخطأ الواقع : محاولة الإصلاح الخارجي دون معايشة الناس ومعرفتهم عن قرب ، والانكفاء على الذات من قبل الناس دون التطلع إلى العالم الخارجي ، والاكتفاء فقط بالتحصن داخل الأعراف والتقاليد والأفكار والمعتقدات العتيقة .
.
~حسن
الناس لا ترى ولا تتذكر إلا المشهد الأخير من القصة،وبناء عليه يبنوا آراءهم وتصرفاتهم.
.
~أبو جبريل
هذه القصه من وجهة نظرى تمثل المعلم الذى يحاول جاهدا ان يدافع عن المجتمع بتنشئة افراده ومحاربة الانفلات والاسفاف الذى هو الصخرة بينما لا يضعه المجتمع اى القلعه فى مكانة يستحقها فضلا عن تجاوزات المجتمع ضده لكن المعلم لن يترك القلعه اى المجتمعي يسحق مهما حدث
.
~محمد
الحريّة والنهضة:
الرجل الذي ينقذ هذه المدينة يمثل كل إصلاحي مضطهد في بلادي العربية من أقصاها الى أقصاها ، كل مُصلح يسعى للنهضة بأمته وبدلا من أن يرفع فوق الأعناق تقديرا طعنت به أمته قبل عدوه، وهم يعلمون جيدا انه من القلائل الذين نطقوا والناس خانسون. شكرا لكل ما مانديلا عربي تجهله أمته
.
~مات
بقالى يومين أقرأ التعليقات لأرى وجهات النظر والتفسيرات المختلفة ولا حظت الآتى: أن هذا المقطع له مردود أفعال وتفسيرات قوية من كافة الدول العربية..كل شخص يفسره برؤيته التى ليست بالضرورة تتماشى مع الجميع..أن هناك من يفسر تفسير ليس كاملآ وبالرغم من ذلك تجد كثيرون يؤيدون ما يقوله بغض النظر عن كل الأحداث ..هناك من شبهه بالعراق وصدام والشيعة والسنة وآخرون إيران واليمن والحوثيون وداعش ودول الخليج ومصر والجيش المصرى والسيسى ومرسى والإخوان وليبيا وغيرهم الكثير..خلاصة ما رأيته أننا كدول عربية بداخلنا ثورة كامنة وإختلافنا وعدم إتفاقنا هى ظاهرة شكليآ سيئة ومؤذية ولكنها فى حقيقة الأمر ظاهرة صحية جدآ وتعنى أن العرب قادمون وكما أذهلوا العالم من قبل سيذهلوه وبمشيئة الله سنرى البشاير قبل وفاتنا…..نتعجل كثيرآ فى أحكامنا ولكن للحقيقة وجه واحد ستظهر إن شاء الله.
.
~مصطفى
 الحكمة والعقل:
كلٌ يغني علي ليلاه .. بل الرجل الحجري هو ضميرك والصخره هي شهواتك
.
~ألب
المقطع يتحدث عن سؤء الظن , فلا بد من فهم الامور اولا ثم الحكم عليها لاحقا , فليس من الحكمة الاستعجال واخذ القرارات المتسرعة التي قد تؤدي الى هلاكك
.
~النسر
اهل القلعة خافو من الوحش ولمن ير الصخرة التي خلفه وهو يحاول ان يحميهم ولكن ليست كل الوحوش شريرة فلا تخدعك المظاهر
.
~وليد وفاتن
اتقي شر من احسنت اليه!! خير تعمل ، شر تلقى!!
.
~هدى
الخوف يولد سوء الظن وبالتالي يخسر الانسان من يقف معه وايضا لا بتحمل عقل الانسان ان القوي خير انما مقرون القوي بالشر
.
~زين
الانسانية:
العمر خالص حاج هاد يقول فارسي وهاد يقول صدام وايران ولك حاج جهل كون شو ما تكون بس كون انساااااااااااان
.
~ابو معلا
انا نفسي افهم شو دخل الدول وكل واحد نازل يكتب عن دولتو الأبية!!
بكل بساطة الفيديو يدل على غباء البشر وعدم فهمهم للواقع ومين لازم يقاتلو ومع مين لازم يصفو !
.
~مجد
الأدب والفن:
أكيد كل واحد يراها بمنظاره
لكنه فنيا وأدبيا مقطع معبر
.
~ايمان
أن من الصخر عدو .. ومنه أيضا يكون الصديق
ومن يفرق بين الصخور .. هو من تكتب له النجاة
.
~اوسامة
الدعابة والسخرية:
المغزى انه الرجل الحجري هدم لهم البرج بسبب البواسير اللي عنده و خرب الدنيا فلازم كان يعمل عملية البواسير قبل ما يهجم على الصخرة و يمكن الشعب فطس من ريحة مؤخرته
.
~طارق
طرائف حول العالم:
أبعث تحية ودية من غوادالاخارا، المكسيك
.
~لويجي
Am i the only one looking for a comment in English!!
.
~Shefin

لو كان شاهين العبقري مغنّي راب لبناني

اليوم تعرّفت على المغنّي الراب المصري شاهين العبقري٬ طبعًا بما انه ربينا عالسينما والاغاني والفن المصري٬ اللهجة المصرية سهلة الفهم علينا بلبنان.  سمعت الراب٬ ودوّنت الكلمات٬ حبّيت ترجمها عاللبناني او لبننها.

رح اعرض الفيديو تحت٬ ورح اكتب مقتطفات وفقرات من كلمات الراب تحت الفيديو (لسبب وحيد انه مش كل الكلمات مفهومة٬ ومش كل الكلمات أثّرت فيي) ورح ترجم الكلمات عاللبناني٬ مش حرفيًا طبعًا٬ بس اذا مثلًا عم يقول شاهين العبقري اللهجة اسكندراني٬ طبعًا رح لبننها وقول اللهجة طرابلسية.

طبعًا كامل الاحترام لشاهين العبقري والراب المصري وللكلمات٬ الهدف اني سوّق لكتابة الراب اللبناني٬ مش انتقد شاهين او الراب المصري.

اسم الاغنية فن سريالي

Screen Shot 2015-07-01 at 4.40.15 PM Screen Shot 2015-07-01 at 5.08.12 PM Screen Shot 2015-07-01 at 5.46.16 PM

كيف تقبّلت عيش بالفوضى

تركت الغربة ورجعت على لبنان٬ ومش اول مرة بعملها٬ هيدي تالت مرة ومش رح قول التالتة ثابتة٬ طول ما راسي بعده عم يبرم.

يمكن التالتة مش ثابتة٬ بس ظروفها ما بتشبه ابدًا اول مرتين رجعت فيهم.

مش رح فوت بالاسباب٬ رح احكي عن شو تغيّر٬ وكيف تقبّلت عيش بلبنان وارجع عالفوضى من بعد غياب دام ١٣ سنة ببلاد اذا مش متطورة٬ فيي قول ما فيها فوضى بتشبه فوضتنا.

يللي تغيّر شي كتير بسيط٬ اكيد لبنان ما تغيّر٬ في ناس يمكن بتقول لبنان عم يمر بأصعب ظروفه٬ مع انه بالعكس انا بشوف لبنان مش عم يروح للأسوأ٬ يللي تغيّر هو طريقة تفكيري بشكل عام٬ وطريقة التعاطي مع الفوضى بشكل خاص.

يقال عني اني عايش بأحلام وردية٬ او رومانسي٬ او خيّلجي٬ او حتى اوقات بسمع اني مثالي٬ او حكيم٬ بس مش الحكيم٬ اقتضى التوضيح.

طبعًا بحب الخيال الواسع اللي مجتمعنا عم يضيّقلنا ياه٬ بس اكتشفت مؤخرًا اني واقعي بس واقع بموقع جغرافي واقع عراسه فاخترت اني عيش الخيال٬ او اتخيّل.

بوجّه تحية لمازن السيّد٬ المعروف ب الراس٬ يللي غنّى لطرابلس الفيحاء بيقول عالمسرح انه عاش بطرابلس هو وعلي صديقه مش راضيين عن الوضع٬ بس تقبّلوا الامر الواقع وصاروا يتخيّلوا المدينة كيف لازم تكون٬ وهيك قدروا يكمّلوا حياتن بهالمدينة٬ يللي هي طبعًا المدينة اللي ربيت فيا كمان.

بعيدًا عن الخيال٬ حابب ارجع عالواقع٬ بس مش المرير٬ مش رح احكي عن السبب اللي رجّعني ع لبنان٬ رح احكي عن كيف تقبّلت ارجع ع لبنان.

أولًا٬ اذا كنت مغترب اليوم وعم تفكّر ترجع ع لبنان بدّك تحط فكرة مهمّة براسك٬ لبنان هيك وبلد الاغتراب هيك٬ لا تحاول تقارن٬ لأن أصلًا ما في مجال للمقارنة٬ اتفقنا؟

ثانيًا٬ اذا فكّرت ترجع ع لبنان بدّك تقتنع انه لبنان فوضى٬ وعايش عالفوضى٬ وتعوّد عالفوضى٬ وما فيك تطلّعه بسهولة من هالفوضى وما شغلتك ورح ترجع توقع بفخ المقارنة اللي اتفقنا انا وياك بأول نقطة٬ انه ممنوع المقارنة٬ صح؟

ثالثًا٬ اذا فكّرت ترجع ع لبنان بدّك تجي تعيش بلبنان٬ مش تزوره اسبوعين تلاتة شهر٬ لأن أصلًا بدّك اسبوعين تلاتة حتى تتعوّد عالفوضى يللي حكينا فيا فوق٬ وبدّك اسبوعين تلاتة غيرن كزدرة حتى تروق شوي من هالصدمة يللي اكلتا٬ وطبعًا اسبوعين تلاتة حتى تصير متل اللبنانيين٬ اذا مش فوضوي٬ عايش بالفوضى٬ امرك ل الله.

رابعًا٬ اذا قررت انك تعيش بلبنان٬ بدّك تفنّش كل شي قبل ما تجي علبنان يا تسلملي٬ لأن الفار بيلعب بعبّك٬ والشيطان بيوسوسلك٬ وحتى بيوشوشلك٬ الشياطين كتيرة بالغربة والاتصالات صارت برخص التراب وكلّه عم يوشوش عالواتساب والفايبر والتانغو وانت هون عم ترقص تانغو وسالسا وسهرات وضهرات وضايعة الطاسة معك وفلتان الزمبرك بمخّك النص واعي.

خامسًا٬ راحت عليك يا حب٬ المقارنة يللي اتفقنا انه ممنوع تستعملا ورقة بايدك٬ طارت٬ خلص٬ بح٬ فينيتو بينيتو٬ ذاتس اول فوكس٬ صار في دارين شاهين ع تلفزيون الجديد تقلّك باي٬ وتأشّرك بايدا٬ وخلصت خلصت قصتنا٬ وانسى٬ اكلت الضرب٬ وصرت بلبنان يا ضنايا.

سادسًا٬ اذا مفكّر حالك جاي تتوظف بلبنان٬ (انتقل الى الفصل السابع ادناه اذا ما مفكّر تتوظف) انت قبضاي٬ وما بعينك٬ وموفّاية معك٬ وعامل حساباتك منيح٬ والضرايب والغلا ببلاد الاغتراب مغرقينك بالصرف والهدر والايجارات٬ وتذاكر السفر من والى٬ هيدا اذا ما جيت مديون او مجنّط انجأ معك قرشين تكزدر فيهم لتطلع من الصدمة اللي حكينا عنها فوق.

سابعًا٬ اذا ما عبالك تتوظف٬ شوف شو بدّك تعمل٬ لا تفتح شركة ما حدا معه يشاركك٬ ولا تفتح ع حسابك بياكلوك لحمة وبيزتّوك عضمة٬ شوبيك؟ ما شو حكينا؟ انت جاي عالفوضى٬ جاي تطبق قوانين ع مين يا غرينغو؟ ما في غير انك تشتغل فريلانس يا فريكانس٬ شي قريب عالكومسينجي٬ بتضرب ضربات٬ وهيدا بلد الفوضى٬ بس بدّك تضرب ضربات صغيرة٬ هت اند رن٬ لأن اذا علقت٬ بيرنّوك رنّ لتقبض مصرياتك يللي انتبه٬ ما حدا بياكلك حقّك٬ بس ما حدا بيحصّلك ياه٬ فهي ذاتا٬ ما اكلتلّك حقّك روح اشتكي٬ وبعطيك حقّك٬ اذا اجا دورك٬ وما رح يجي دورك٬ في متلك امتال٬ واذا اجا دورك بتكون نسيتن٬ لانك فهمت اللعبة٬ يا محلل يا استراتيجي انت٬ رحت عالغربة متفوّق وعبقري٬ وبس رجعت غرقت بشبر مي٬ ولو؟

رح وقّف هون٬ اذا قدرت تفهم منيح كيف تتقبّل اللي فوق٬ يعني تقبّلت تعيش بالفوضى ويمكن عالفوضى٬ لأنك تعوّدت عليا٬ ومن بعد تسعمية عملية نصب واحتيال ونهب وسرقة٬ اتدرّبوا عليك الجماعة يا فهلوي٬ اخدوك عالبحر وردوك عطشان٬ تعا حتى اسقيك تعا.

تويتر هو غوغل التلفزيون

لو طُلب مني اكتب برنامج تلفزيوني رح يكون التالي:

برنامج بيقيّم كل البرامج من خلال تغريدات المشاهدين، بالرأي مش بالارقام.

طبعًا حواري بيستقبل مغردين ومغردات وبياخد اتصالات من الممثلين والممثلات والمخرجين والمخرجات والكتّاب والمنتجين، يعني تمامًا بالعكس.

 شبعنا مشاهير تطلع عالتلفزيون ويستقبلوا اتصالات او مداخلات من المشاهدين، هالمرة بالعكس، المشاهد بيقيّم والمشاهير بتتصل حتى تعطي رأيا بمداخلة.

وشبعنا من الجمهور اللي بالاستديو بيزقّف ع كل فاصل اعلاني واذا حكي بيعطوه ٣٠ ثانية. بدّي الجمهور والمشاهد والشعب التويتري هو ضيف البرنامج.

بدّي برهن للمشاهير انه في ناس اقوى واشهر واذكى ومبدعة اكتر منهم، ناس عاديين متلي ومتلك بيفهموا باختصاصاتهم بس ما حدا عطاهم فرصة بالتلفزيون.

 التلفزيون جدًا مشفّر وسطحي بالنسبة لتويتر، كل كلمة محسوب حسابا، تويتر مفتوح، بتشوف ناس عم تغرّد بتقول يا ريته بيطلع عالتلفزيون بدل فلان.

 معظم البرامج عم تكون سخيفة لأن تويتر سبق التلفزيون من ناحية سرعة التغطية او المهارات الموجودة، كم خبر عالتلفزيون شفناه من اسبوع ع تويتر؟

 وكم معلومة عالتلفزيون فيا مغالطات او خطأ بالعمق بس مشفرينها او مسيسينها او مزبطينها لتناسب المشاهد؟ وكم مهضوم عالتلفزيون في ٦٠ ألف اهضم منه؟

التلفزيون لازم يكمّل تويتر، مش يقلّده ومن بعد اسبوع على صدور اي خبرية. التلفزيون لازم يوديك ع تويتر وتويتر لازم يرجعك عالتلفزيون، ٣٦٠ درجة.

 كل شي لازم ينبع من الناس من هلق ورايح، ما بقى فيك تعتمد على اعلاميين بس، الاعلامي شو بده يلحّق حتى يلحّق؟ بفهم عنده فريق، بس تويتر فيه آلاف.

 بتمشّي برنامج من ورا تغريدات يا صديقي، ما في غير انك تشوف شو عم ينحكى عن موضوع معيّن، ركبت الحلقة، ركب البرنامج، والضيوف. ناقصن تلفزيون.

 تويتر هو غوغل التلفزيون وكفى.

A Love Story From The War-Torn Rooftops of Tripoli To Lebanon

A Separate State of Mind | A Blog by Elie Fares

Love and War on the Rooftop - a Tripolitan tale

Welcome to Lebanon’s Tripoli, the city most of the country loves to hate.

A few months ago, whenever Tripoli was mentioned in casual conversation, it would be surrounded by a spew of sectarian hate speech. That conversation you heard or maybe even pa
rticipated in probably lacked depth, was never in context, always judgmental and served to further deepen the chasm between this Northern city and the rest of the country.

There’s nothing in this country that’s a more heart-breaking story or tragedy than the current state of Tripoli. Boasting the country’s biggest old souks, richest people, most important architectural feats and second largest population, it is also the country’s poorest, least developed, least cared for and least acknowledged place.

A lot can be said about that city, and I have over, and over, and over again. One thing for sure, however, is that the potential that Tripoli…

View original post 1٬019 more words

الثورة بتموت لمّا نجوع

صرلي مدة عم فكّر بالجوع، يمكن لأنّي جعت كتير آخر فترة، من بعد اكتر من سنة ماشي على نظام دايت معيّن بيحافظ عالصحة البدنية قبل الوزن والشكل.

بس هالتدوينة مش للدايت ومش للصحة، هالتدوينة للثورة، الثورة ضد الظلم.

قرأت كتير تغريدات على تويتر انه الجوع سينتصر، وسيأكل الفقير الاغنياء، والجوع سبب او مكوّن اساسي للثورة، ورح يجي نهار الجوع رح يوحّد الشعوب، وتوحيد الشعوب فشلت بتحقيقها كل الاديان والايديولوجيات والسياسات والانظمة، وما في غير الجوع هو الحل.

ناقشت شوي مش كتير مع بعض اليساريين بموضوع الجوع، ووصلت لقناعة انه الجوع ضروري للاتحاد وللانتصار على الظلم، بس لمّا كنت اسألهم كيف الشعب اذا جاع رح يقدر يحارب قبل ما ينتصر؟ من اين يستمد الطاقة العقلية والفكرية والبدنية اذا عانى من سوء التغذية؟ كيف بده يثور اذا ما آكل لقمة؟

اليوم كتبت تغريدة بتقول:

شعب جوعان اذا شبع اغتنى واذا اغتنى سرق واذا سرق حكم واذا حكم استبد واذا استبد ظلم واذا ظلم اخطأ واذا اخطأ خبّأ واذا خبّأ افسد.

رجعت فكّرت فيا للتغريدة، برافو هيدا سيناريو للجوعان اذا شبع، بس بدي احكي عن سيناريو تاني، سيناريو ثورة الجوعان.

عمرك شفت شعب جوعان عم بيثور؟ عمرك شفت الصومال لمّا صار عندن مجاعة شو صار؟ شو صار بالصومال؟ طبعًا معروفة سياسة الشح، ومعروف كتير منيح مين صنع هالشح والمجاعة، ومعروف كتير منيح مين عم يشفط موارد افريقيا والشرق الاوسط الاولية والثروات الطبيعية.

اذا جاع الشعب، بدّه يرجع للأرض، للزراعة تحديدًا، لقطف الثمار، للفاكهة والخضار الموسمية، للمواد الغذائية الاساسية، اللي معظمها بيطلع من الارض، للنباتات، للمواشي، لحياة المزرعة.

اذا الارض مش عم تنتج، اذا المزارع حرقت، اذا المواشي انقرضت، اذا المواد الغذائية الاساسية فقدت من السوق، شو بياكل الشعب؟ بيموت بأرضه ما في مين يلمّه.

الا اذا استنجد بجهات ومؤسسات غذائية، وهيدي بتكلّف مصاري مش ببلاش، يمكن تاخدها ببلاش، بس شي ع حساب شي تاني.

ولاحظ انه هالمؤسسات بيعطوا غذاء ما بيزرعوا، ما بيهتموا بالمواشي والزراعة، بيعطوا علب وكراتين ومواد غذائية جاهزة. ما سألت حالك ليه؟

اذا جعت، اعتبر انه ثورتك ماتت، رح تنسى الظالم وتفكّر بلقمة تغني وتسمن وتطعميك حتى تعيش وتكمّل نهارك.

اذا استنجدت، اعتبر انه ثورتك ماتت، الفرقة اللي عم تطعميك هي نفسا الفرقة الظالمة، بس الفرق بتطلق على نفسها وبتتصرف وبتشتغل تحت مسمّى مؤسسة انسانية خيرية غير ربحية.

اذا استنجدت بدول او تنظيم او انظمة اخرى رح يطعموك، بس مش رح يقبلوا بثورتك على الظلم، ما في دولة بتقدملة نجدة من دون ما تفرض عليك شروط، واصلًا بيستغلّوا ضعفك وجوعك وفقرك حتى يستحكموا فيك بالظلم والاستبداد، وحتى اكيد يبعدوك عن ثورتك الحقيقية يللي هي ضدهم بالاساس.

الثورة بتموت لمّا نجوع. مش مسموح نجوع. لا نريد ان نجوع لنثور. اذا جعنا فات الاوان. لازم تثور لمّا تكون عم تاكل اذا مش شبعان، لمّا تكون قادر جسديًا اذا مش قوي وحديدي البنية. 

الثورة تحتاج الى تغذية العقل والبدن والفكر والثقافة. الثورة تبدأ عندما تكون حاضر بدنيًا وفكريًا وعلميًا وتكنولوجيًا، وليس عندما تكون فقيرًا جائعًا لا حول ولا قوة.

ومش كل شخص اشتراكي صار فقير وجوعان، ومش كل مزارع او فلاح فقير وجوعان، ومش كل عامل كادح فقير وجوعان، ومش كل شخص عادى وحارب الرأسمالية يعني فقير وجوعان، يمكنك ان تكون ميسورًا مرتاحًا شبعانًا حتى تثور على الرأسمالية والطغيان والظلم والاستبداد.

تحتاج فقط الى التعاون، الى التحالف، الى الائتلاف، الى توحيد الصفوف وتشكيل محور قوي وعملاق يقف بوجه المارد الطاغية، وهيدي ما بتبلّش بمكان معيّن، او ببقعة أرض صغيرة وبتكبر، اصلًا بلّشت بكتير بقع حول العالم وكتير شعوب مقتنعة بالاشتراكية ضد الرأسمالية، كل ما علينا ان نتحد، ان لا نجوع او نسمح لأحد بأن يجوع، ان نساعد الجائعين بتشجيعهم عالزراعة ونوفر لهم مزارع ليأكلوا من ثمارها ونوفر لهم المواشي.

فقط عندما نتعاون في تأمين التغذية الصحيحة (مزارع مش كراتين وعلب جاهزة) ونثقفهم ونوفر لهم مأكل ومشرب ومأوى ومصدر رزق، عندها يمكننا ان نثور جميعنا. والا الثورة ميتة.